Leggja niður störf á morgun að óbreyttu

Tugir ungra lækna á Landspítalanum munu leggja niður störf frá og með morgundeginum ef ekki næst sátt um breytingar sem fyrirhugaðar eru á spítalanum. Þetta er mikill meirihluti almennra lækna á spítalanum," segir Gunnar Thoroddsen, hjá Félagi almennra lækna. Hann segist ekki geta sagt til um hversu margir læknar leggi niður störf. Þó er ljóst að þeir hlaupa á tugum.

Deilan snýst um það að í lok desember var læknum tilkynnt um breytingar á vinnufyrirkomulagi sem þeir telja að nemi um 5-6 vikum í viðbótarvinnu á ári, án þess að til komi kjarabót. Læknarnir telja að með þessu fyrirkomulagi séu brotin lög um hámarksvinnutíma.

„Við unum ekki þessari breytingu," segir Gunnar, en bendir á að hann vonist til þess að hægt verði að ná samkomulagi í tæka tíð. Það er hins vegar skammur tími til stefnu því að uppsagnirnar taka gildi á morgun.