Afstaða rektors kom mönnum í opna skjöldu

Afstaða Magnúsar Árna Magnússonar, rektors Háskólans á Bifröst, um að slíta eigi viðræðum um sameiningu skólans við Háskólann í Reykjavík, kom stjórnarformönnum skólanna í opna skjöldu. Viðræðum um mögulega sameiningu verður haldið áfram. Þetta kemur fram í sameiginlegri yfirlýsingu frá Andrési Magnússyni, formanni stjórnar Háskólans á Bifröst, og Finn Oddssyni, formanni háskólaráðs Háskólans í Reykjavík.

Háskólinn á Bifröst og Háskólinn í Reykjavík hafa átt í sameiningarviðræðum í undanfarna mánuði. Í fréttum RÚV um málið í fyrradag kom fram að á meðal þess sem þessar viðræður hafa skilað er að til greina kemur að við sameinguna verði nánast öll háskólakennsla flutt frá Bifröst og til Reykjavíkur. Þetta gagnrýndi Magnús Árni Magnússon, rektor Háskólans á Bifröst, harðlega í fréttum Stöðvar 2 í gær. Hann sagðist ekki ætla að verða rektorinn sem myndi leggja niður háskólastarf á Bifröst. Þá kom fram í máli hans að hann vildi að skólinn drægi sig út úr sameiningarviðræðum.

Andrés og Finnur segja að ekki standi til að leggja niður alla háskólastarfsemi á Bifröst. „Hið rétta er að stefnt hefur verið að því að sameina kennslu á ákveðnum námsbrautum í húsnæði Háskólans í Reykjavík, en efla á Bifröst starfsemi eins og hagnýta þjálfun, styttri námsbrautir, frumgreinanám, námslotur í háskólanámi, stjórnendanám, endurmenntun og sumarskóla. Í þessu fælust ennfremur ýmis tækifæri til samstarfs við aðra háskóla og menntastofnanir."

Í yfirlýsingu þeirra segir ennfremur: „Magnús Árni Magnússon, rektor Háskólans á Bifröst hefur tekið fullan þátt í þessu viðræðum og talað fyrir þeim, nú síðast á fundum með starfsfólki og nemendum skólans í síðustu viku. Því hefur sú breytta afstaða hans sem fram hefur komið um helgina, að hætta beri þessu viðræðum, komið okkur í opna skjöldu."