Óásættanlegt að leggja niður háskólastarf á Bifröst

Hollvinasamtök Háskólans á Bifröst leggjast alfarið gegn hugmyndum sem fela í sér að háskólakennsla verði flutt frá Bifröst til Reykjavíkur. Samtökin leggja ríka áherslu á að sameiningarviðræður Háskólans á Bifröst og Háskólans í Reykjavík sem hafa staðið undanfarna mánuði fari fram á jafnræðisgrunni. „Að okkur hálfu er mjög skýrt að það á ekki að leggja Bifröst niður," segir formaður samtakanna.

Háskólinn á Bifröst og Háskólinn í Reykjavík hafa átt í sameiningarviðræðum í undanfarna mánuði. Í fréttum RÚV um málið í fyrradag kom fram að til greina komi að við sameingu skólanna verði háskólakennsla flutt frá Bifröst og til Reykjavíkur, en á Bifröst yrði þá eingöngu frumgreinadeild og styttri námskeið. Þetta gagnrýndi Magnús Árni Magnússon, rektor Háskólans á Bifröst, harðlega í fréttum Stöðvar 2 í gær. Hann sagðist ekki ætla að verða rektorinn sem myndi leggja niður háskólastarf á Bifröst. Þá kom fram í máli hans að hann vildi að skólinn drægi sig út úr sameiningarviðræðum. Í kvöldfréttum Ríkisútvarpsins í gær sagði Páll S. Brynjarsson, sveitarstjóri Borgarbyggðar, að sameiningin yrði gríðarlegt áfall fyrir samfélagið í Borgarfirði.

„Við erum opin fyrir öllu en við viljum ekki að Bifröst renni inn í annan skóla," segir Hlédís Sveinsdóttir, formaður Hollvinasamtaka Háskólans á Bifröst, í samtali við fréttastofu. Að mati stjórnar samtakanna eru þær forsendur sem virðast nú vera uppi í viðræðum á milli aðila óásættanlegar.

„Við höfum fulla trú á starfsemi skólans en hann þarf eins og allir aðrar skólar að bregðast við breyttum efnahagslegum aðstæðum. Það verður samt ekki gert með því að leggja skólann niður," segir Hlédís.

Hollvinasamtökin leggja áherslu á að haldið verði áfram að leita leiða til að tryggja aukna hagkvæmni í rekstri háskólastigsins og „að allir kostir verði skoðaðir í því samhengi, t.a.m. breyttar áherslur í viðræðum við Háskólann í Reykjavík eða aukið samstarf eða sameining landsbyggðarháskólanna."