Ræða hugsanleg málaferli vegna gjaldeyrisdómsins

Fjöldi gesta hefur verið boðaður á sameiginlegan fund viðskiptanefndar og efnahags- og skattanefndar Alþingis sem hefst klukkan tíu í dag.

Helgi Hjörvar, formaður efnahags- og skattanefndar, segir að farið verði yfir ýmis mál tengd gengistryggðum lánum sem dæmd voru ólögleg þann 16. júní síðastliðinn. Á fundinn hafa verið boðaðir seðlabankastjóri, viðskiptaráðherra, fulltrúar úr fjármálaráðuneytinu, fulltrúar frá Alþjóðagjaldeyrissjóðnum og Talsmaður neytenda.

Kröfuhafar föllnu bankanna, sem nú eiga hluti í nýju bönkunum, íhuga málaferli gegn íslenska ríkinu vegna forsendubrests eftir að dómurinn var kveðinn upp. Helgi segir að þau mál verði rædd eins og annað sem tengist málinu.