Hyggjast leigja makrílkvóta

Sú hugmynd er rædd af alvöru innan sjávarútvegsráðuneytisins, samkvæmt heimildum Fréttablaðsins, að makrílkvóta þessa árs, sem er 130 þúsund tonn, verði ekki deilt út til útgerðanna í landinu í neinu samhengi við veiðireynslu þeirra. Útgerðir sem hafa aflað sér veiðireynslu undanfarin fjögur ár muni fá tiltekið magn í sinn hlut en frekari veiðiheimildir þurfi viðkomandi útgerð að greiða fyrir.

Jón Bjarnason, sjávarútvegs- og landbúnaðarráðherra, vill ekki staðfesta að róttækar hugmyndir í þessa veru séu ræddar innan ráðuneytisins þegar eftir því var leitað í gær.

Heimildir Fréttablaðsins herma að sjávarútvegsráðherra fundi í dag með sjávarútvegsnefnd og þar verði útfærslur makrílveiðanna ræddar. Eins að reglugerð um veiðarnar verði jafnvel gefin út í dag, enda ekki seinna að vænna þar sem veiðarnar eru hefjast von bráðar.

Heimildum ber ekki saman um hversu langt verður gengið. Þó hefur verið nefnt að allt að 50 þúsund tonnum verði haldið eftir hjá ríkinu í byrjun og áttatíu þúsund tonn komi í hlut útgerðanna. Sú aðferð sem verður ofan á er aðeins hugsuð til eins árs.

Útgerðarmenn hafa sagt að eðlilegt sé að skipta meirihluta makrílkvótans á milli þeirra skipa sem stundað hafa veiðarnar, en jafnframt að tekið verði til hliðar ákveðið magn fyrir þá sem vilja spreyta sig við makrílveiðarnar. Þegar horft er til síðustu fjögurra ára hafa skip til uppsjávarveiða, sem tilheyra tiltölulega fáum stórum útgerðum, veitt 99,99 prósent kvótans, eða vel á þriðja hundrað þúsund tonn. Aðrir hafa veitt 21 tonn.

Samkvæmt heimildum Fréttablaðsins er í raun aðeins hægt að tala um samfellda veiðireynslu á makríl í eitt ár í skilningi laganna, eða á síðasta ári, því áður voru veiðar ekki takmarkaðar. Í lögum segir að „sé ekki fyrir hendi samfelld veiðireynsla úr viðkomandi stofni skal ráðherra ákveða veiðiheimildir einstakra skipa. Skal hann við þá ákvörðun meðal annars taka mið af fyrri veiðum skips." Það virðist því ljóst að hyggist ráðherra gera róttækar breytingar á því hvernig kvótanum verður skipt, er hann ekki bundinn af lögum. - shá