Kennir hollenskum hommum um fjöldamorðin í Bosníu

Fyrrverandi hershöfðingi í Bandaríkjaher segir að Hollendingum hafi mistekist að koma í veg fyrir fjöldamorðin í Srebrenica á sínum tíma vegna þess að her landsins hafi veikst við það að hommum var hleypt í herinn. John Sheehan, sem meðal annars starfaði hjá NATO í Evrópu, lét þessi orð falla á fundi hjá hernum þar sem rætt var um hvort yfirlýstum hommum verði leyft að ganga í herinn. Ummælin hafa vakið mikla athygli og Hollendingar segja hershöfðingjann rugla.

Hann sagði að hollensku hermennirnir sem staðsettir voru í Srebrenica í borgarastríðinu í Júgóslavíu hafi ekkert getað gert til þess að afstýra fjöldamorðunum sem Serbar frömdu á múslímum í borginni. Herinn hefði verið illa vopnum búinn og óvanur átökum. Hann bætti því síðan við sú staðreynd að Hollendingar leyfi homma í her sínum hafi átt þátt í því hvernig fór.

Fundarstjórinn spurði Sheehan þá hvað hann hefði fyrir sér í þessu og hvort að yfirmenn í hollenska hernum hefðu sagt honum þetta og svaraði hann því til að þeir hafi sagt sér að þetta hafi verið hluti af vandamálinu.

Talsmaður varnarmálaráðuneytis Hollands hefur þegar brugðist við yfirlýsingum Sheehans og segir þær algert rugl.

Í herjum Breta, Kanada, Ástralíu, Ísraels og Hollands er yfirlýstum hommum leyft að gegna herþjónustu.