Missti tíu milljóna réttindi fyrir mistök

Björn Hafþór Guðmundsson, sveitarstjóri á Djúpavogi, nýtur allt að tíu milljóna króna minni lífeyrisréttinda en lagt var upp með þegar hann var ráðinn til sveitarfélagsins fyrir átta árum.

Björn Hafþór hóf að greiða í Lífeyrissjóð starfsmanna ríkisns (LSR) þegar hann gerðist kennari á Stöðvarfirði árinu 1968. Því hélt hann áfram á meðan hann var sveitarstjóri Stöðvarhrepps á árunum 1982 til 1991, framkvæmdastjóri Samtaka sveitarfélaga á Austurlandi til 1998 og bæjarstjóri á Austur-Héraði til ársins 2002. Þegar LSR var skipt í A-deild og B-deild, valdi Björn Hafþór B-deildina eins og flestir eldri sjóðfélagar.

Á daginn kom að Djúpavogshreppur fyrir sitt leyti hafði ekki formlega sótt um aðild að B-deildinni. Þetta hafði í för með sér að Björn Hafþór, sem nú er 63 ára, gat ekki nýtt sér svokallaða 95 ára reglu um sameiginlegan líf- og starfsaldur til að fara fyrr á eftirlaun. Í haust nær þessi samanlagði aldur hjá Birni Hafþóri 105 árum. Með öörum orðum þá hefði hann getað farið á eftirlaun fyrir fimm árum ef sveitarfélaginu hefði sótt um aðild að B-deild LSR. „Það hefur verið reiknað út, miðað við lífaldur og fleira, að þetta séu átta til tíu milljónir króna sem munar,“ útskýrir hann réttindamissinn.

Bæði Héraðsdómur Reykjavíkur og Hæstiréttur dæmdu að Birni Hafþóri hefði ekki réttindi eins og ef hann hefði verið í B-deild lífeyrissjóðsins.

„Mönnum láðist bara að sækja formlega um aðild að þessu. Þegar þeir réðu mig voru allir í góðri trú. Þetta er bara eitthvert ansans formsatriði sem þeir hjá lífeyrissjóðnum eru að hengja sig í,“ segir Björn Hafþór.

Mál sveitarstjórans hefur um allnokkurt skeið verið til umfjöllunar innan sveitarstjórnar Djúpavogs sem telur ljóst að ekki hafi verið staðið við ráðningarsamning og hann eigi kröfurétt á sveitarfélagið. Oddvitanum var því falið að semja við Björn Hafþór og leysa málið „á sem ásættanlegastan hátt fyrir báða aðila“. Tryggingarfræðingur hefur farið yfir stöðuna en málið er þó enn óafgreitt.

Sjálfur kveðst sveitarstjórinn aldrei hafa ætlað að gera sveitarfélagið að fullu ábyrgt fyrir hans réttindatapi og ætli ekki að fara í málaferli.

„Ég hef orðað það þannig að mér hafi einfaldlega verið refsað fyrir að flytja yfir Öxi; úr Skriðdal og niður í Berufjörð,“ segir Björn Hafþór, sem ætlar að hætta eftir kosningar í vor og kveðst bera sig vel. „Trúlega eru margir jafnaldrar mínir verr settir en ég hvað lífeyri snertir.“

gar@frettabladid.is