Hvorki vopn né hermenn fylgja starfseminni

Bjarni Benediktsson, formaður Sjálfstæðisflokksins, segir fulla ástæðu til að taka hugmyndum hollenska fyrirtækisins E.C.A. Program með jákvæðu hugarfari. E.C.A. er einkarekið hernaðar­fyrirtæki sem vill koma upp einkareknum flota vopnlausra orrustuþotna á Keflavíkurflugvelli.

Bjarni segir að þverpólitískur stuðningur sé við áform E.C.A. á Suðurnesjum og unnið hafi verið að málinu í stjórnkerfinu. „Svo þegar reynir á stuðning frá ríkisstjórninni þá bregst hann eins og í svo mörgum öðrum málum. Það virðist vera sama hvaða hugmyndir fólkið á Suðurnesjum kemur með til uppbyggingar atvinnulífinu, alltaf er ríkisstjórnin á móti."

Málið snúist um að nýta þá aðstöðu sem íslensk stjórnvöld tóku yfir við brottför varnarliðsins á því svæði landsins þar sem atvinnuleysi er nú mest. E.C.A. geti skapað yfir 200 störf fyrir flugvirkja og sérhæfða þekkingu sem tengist flugiðnaði. „Þessu fylgir mikil erlend fjárfesting," segir Bjarni.

Það sé langt seilst að halda því fram að E.C.A sé „í hernaðarbrölti".

Fyrirtækið veiti NATO-ríkjunum þá þjónustu að taka það að sér að vera andstæðingurinn á heræfingum. „Það fylgja starfseminni engin vopn og engir hermenn. Þess vegna finnst mér full ástæða til að taka hugmyndinni með jákvæðu hugarfari."

„Við erum sjálf að reka hér Varnarmálastofnun sem rekur eftirlit með lofthelginni á Norður-Atlantshafi og kemur upplýsingum og merkjum til hinna NATO-ríkjanna. Með skapandi hugsun mætti segja að þar með værum við komin í hernaðarbrölt, sem við erum ekki, frekar en þetta félag." - pg