SA: Sparnaður í stað skattahækkana

Samtök Atvinnulífsins segja svigrúm til skattahækkana fullnýtt út árið 2011. Samtökin leggja til að sparnaði verði beitt til að ná böndum á ríkisfjármálin og leggja til aukinn einkarekstur í því skyni, meðal annars í heilbrigðisþjónustunni, og að lífeyrisaldur verði hækkaður.

Hallarekstur ríkissjóðs var um 9% af landsframleiðslu á síðasta ári, og verg skuldastaða hins opinbera yfir 120%. Í riti sem Samtök Atvinnulífsins kynntu í morgun eru tillögur að nauðsynlegum umbótum í fjármálum hins opinbera, meðal annars til að draga úr vaxtakostnaði vegna hinna miklu skulda.

Þar segja samtökin að ekkert svigrúm sé til frekari skattahækkana til ársins 2011. Samtökin leggja því til sparnað og gjaldalækkanir til að rétta halla ríkissjóðs og segja hvergi mega hvika frá markmiði um jöfnuð í opinberum fjármálum árið 2013.

Samtökin beina einkum sjónum sínum að stærstu útgjaldaliðum ríkissjóðs í því tilliti, eða heilbrigðiskerfinu, mennta- og menningarmálum og félagslegum tryggingum. Þá er einnig hvatt til aukinnar hagræðingar hjá stofnunum hins opinbera og sveitarfélögum.

Hvað heilbrigðismál varðar er vitnað til skýrslu frá OECD og sagt að hægt sé að ná fram 30-40% sparnaði í heilbrigðiskerfinu, meðal annars með samkeppni og auknum einkarekstri.

Í menntamálum er lagt til að allir háskólar verði gerðir að sjálfseignarstofnunum, tekin verði upp skólagjöld í ríkisháskólum, að framhaldsskólanám verði stytt og framhaldsskólar verði sameinaðir.

Þá er stungið upp á að ljósvakamiðlar í samkeppni við Ríkisútvarpið fái tækifæri til að bjóða í lögbundin verkefni þess í opnu útboði og bein opinber fjárlög til ríkisútvarpsins falli niður.

Í ritinu er jafnframt stungið upp á því að hækka almennan aldur til töku lífeyris úr 67 árum í 68, og úr 65 í 68 ár hjá lífeyrissjóðum opinberra starfsmanna.

Samtökin leggja áherslu á að vinnubrögð við fjárlagagerð gerbreytist í vinnunni sem framundan er, og stjórnvöld móti sér framtíðarsýn í ríkisfjármálunum, í stað þess að horfa til eins árs í senn.