Frábært skíðafæri víðast hvar

Skíðasvæðin á Norður- og Austurlandi eru flest opin í dag og færi gott. Í Hlíðarfjalli á Akureyri opnaði klukkan níu og verður opið til klukkan fimm. Þar er um fjögurra gráða frost, 2 til 3 metrar á sekúndu og snjókoma.

Á Sauðárkróki opnaði svæðið klukkan tíu og verður til klukkan fjögur. Þar er mjög mikill snjór og var alveg kolvitlaust veður í nótt en unnið var hörðum höndum við að gera klárt fyrir gesti. Þar eru um fjórir metrar á sekúndu og tæplega fimm gráða frost og skýjað.

Skíðasvæðið á Dalvík verður opið til klukkan fimm. Þar er um 30 sentimetra ný jafnfallinn snjór yfir öllu og frábært skíðafæri í nýtroðnum brekkunum. Það snjóar aðeins í logni en það er ágætis skyggni og um 2 stiga frost. „Sem sagt frábærar aðstæður fyrir alla sem vilja skella sér á skíði í troðnum brekkum eða þá sem vilja mikið að púðursnjó sem er út um allt", segja forsvarsmenn.

Þá er einnig opið í Stafdal í Seyðisfirði en þar opnar klukkan ellefu og verður opið til klukkan fimm. Þar er frábær veðurspá að sögn heimamanna og fínasta færi, enda um „alvöru íslenskan snjó" að ræða, eins og segir í tilkynningu.