Himinn og haf skilur að slökkviliðsmenn og vinnuveitendur

Himinn og haf skilur að kröfur slökkviliðs og sjúkraflutningamanna og það sem sveitarfélögin eru tilbúin að bjóða þeim, en verkfallsaðgerðir þeirra hefjast í fyrramálið. Áætlanaflug til Akureyrar raskast vegna aðgerðanna.

Aðgerðirnar standa frá klukkan átta í fyrramálið til klukkan fjögur. Þar sem slökkviliðsmenn á Akureyrarflugvelli eru í Landssambandi slökkviliðs- og sjúkraflutningamanna hafa aðgerðirnar áhrif á áætlaflug þangað. Flugfélag Íslands hefur því flýtt morgunferðum sínum norður til klukkan korter í sjö, fellt niður hádegisferðina og seinkað kaffivélinni frá Reykjavík til klukkan korter yfir þrjú. Flug til Grímseyjar, Þórshafnar og Vopnafjarðar frá Akureyri raskast ekki. Ekkert hefur verið fundað í deilunni frá því á fimmtudag fyrir viku, þegar slökkviliðsmenn höfnuðu tilboði frá samninganefnd sveitarfélaganna. Formaður samninganefndar sveitarfélaganna segir kröfur slökkviliðsmanna langt frá því sem sveitarfélögin geti boðið.

Samningar slökkviliðsmanna hafa verið lausir frá því í ágúst í fyrra en um það leyti höfnuðu þeir gerðum samningi í atkvæðagreiðslu. Inga Rós segir sveitarfélögin bundin af stöðufleikasáttmálanum sem gildi fram í nóvember. Hann miði að því að leiðrétta laun undir 200 þúsund krónum á mánuði en meðalheildarvinnulaun slökkviliðsmanna séu um 470 þúsund á mánuði og meðal dagvinnulaun um 250 þúsund. Slökkviliðsmönnum var boðin 1,4 prósenta hækkun sl. fimmtudag fram að nýrri samningslotu í haust.