Mikill erill hjá gæslunni í tengslum við loðnuveiðarnar

Mikill erill hefur verið hjá Landhelgisgæslunni undanfarna daga vegna loðnuveiða Norðmanna djúpt undan Austfjörðum. Varðskip hefur verið við eftirlit á miðunum en gefinn var út loðnukvóti fyrir norsk skip upp á 28.431 tonn. Öll norsku skipin hættu veiðum í gær sunnudag og tilkynntu þau alls 27.745 tonna afla að því er fram kemur í tilkynningu frá Landhelgisgæslunni.

„Norsku skipin byrjuðu að streyma á miðin 2. febrúar en af 79 skipum sem höfðu veiðileyfi komu 31 skip til veiða. Alls var 25 skipum leyft að veiða í einu og voru því 6 skip á biðlista þar til önnur skip voru búinn að veiða og farin annað hvort til Íslands eða Noregs til löndunar," segir ennfremur.

„Að morgni föstudagsins 5. febrúar kom fyrsta skipið í athugunarstöð varðskipsins og eftir daginn voru sex skip athuguð af landhelgisgæslumönnum. Daginn eftir komu alls tólf skip í athugunarstöðina, það fyrsta um miðnætti og síðasta skipið um miðnætti sólarhring síðar. Veiði skipanna lá niðri yfir daginn, en gaus upp þegar rökkva tók og var því álagið mikið þegar skipin fylltu sig nánast á sama tíma," segir ennfremur en meðfylgjandi mynd er tekin af áhöfn varðskipsins þegar þeir voru við eftirlit í norsku loðnuskipunum SVANAUG ELISE og VENDLA.