Afla upplýsinga um áhrif stjórnarkreppunnar á Icesave

Fjármálaráðuneytið reynir að afla sér upplýsinga um áhrif stjórnarkreppunnar í Hollandi á viðræður Hollendinga og Breta um lausn Icesavedeilunnar við Íslendinga. Í gær var boðað að gagntilboð við hugmyndum Íslendinga bærist í dag en það hafði ekki gert það nú fyrir hádegi.

Samkvæmt heimildum fréttastofunnar hafa Hollendingar og Bretar fallist á að bjóða íslendingum mun lægri vexti en þau 5,55 prósent sem eru á núgildandi Icesave skuldbindingum, eða í kring um tvö prósent. Þá herma aðrar heimildir að þeir muni bjóða breytilega vexti. Hvaða áhrif brotthvarf Wouter Bos fjármálaráðherra úr hollensku stjórninni hefur á viðræðurnar liggur ekki fyrir á þessari stundu, en upplýsingafulltrúi fjármálaráðherra segir að verið sé að kanna það í ráðuneytinu. Ekkert gagntilboð hafði borist ráðuneytinu fyrir hádegi.

Bjarni Beneditksson formaður Sjálfstæðisflokksins var vongóður um farsæla lausn mála í gær, en sagði Breta og Hollendinga hingað til hafa haft fáránlegar hugmyndir um vexti á skuldbindingunum.