Ögmundur þakkar forsetanum fyrir skelegga framgöngu

Ögmundur Jónasson, þingmaður VG og fyrrverandi ráðherra, þakkar Ólafi Ragnari Grímssyni, forseta Íslands, fyrir skelegga framgöngu í Icesave málinu. Nauðsynlegt sé að Íslendingar sýni fram á ofbeldið sem Ísland hafi verið beitt af hálfu Breta, Hollendinga, ESB og Alþjóðagjaldeyrissjóðsins. Ögmundur segir að þar hafi forsetinn ekki látið sitt eftir liggja samanber viðtal sem CNN fréttastöðin tók við hann í gær.

Í viðtalinu sakaði Ólafur Ragnar Breta og Hollendinga um að leggja Ísland í einelti. Hann sagði að þjóðirnar beittu áhrifum sínum innan Alþjóðagjaldeyrissjóðsins til þess að stöðva milljarða lán sem Ísland þyrfti nauðsynlega til þess að endurbyggja hagkerfið.