Stúlkan þarf hjálp

Bandarískur læknir sem annast hefur íslenska telpu sem glímir við alvarleg veikindi undrast að íslenskir læknar hafi ákveðið að kæra foreldra stúlkunnar til barnaverndaryfirvalda fyrir að vilja fara með hana í uppskurð á heila. Aðgerðin sé nauðsynleg.

Systurnar Gabríella og Anika Árnadætur þjást af sjaldgæfu heilkenni sem nefnist Golden har. Einkenni þess eru mjög flókin og margvísleg en meðal annars geta eyru verið vansköpuð, misvöxtur orðið í beinum, tengingar tauga við heila verið óeðlilegar svo fátt eitt sé nefnt.

Í heila Gabríellu er blaðra sem doktor David Coulter læknaprófessor við Harvard, sem annast hefur telpuna á Barnaspítalanum í Boston, segir þurfa að skera í burtu ef hún eigi að geta náð framförum í námi og til að draga úr höfuðverkjum hjá henni.

Coulter hefur ýtt á eftir aðgerðinni í talsverðan tíma en íslenskir kollegar hans eru honum ósammála. Fyrir skömmu vísuðu þeir málinu svo til barnaverndaryfirvalda þar sem þeir telja að með aðgerðinni séu óþarfa þjáningar kallaðar yfir barnið.

Samkvæmt heimildum fréttastofu gruna þeir móðurina um að hafa svokallað Münchausenheilkenni, sem stundum birtist þannig foreldrar gera börnum sínum upp veikindi.

Doktor Coulter segir það hvorki sitt mat né annarra sérfræðinga á taugadeildinni í Boston, sem kannað hafa ástand Gabríellu, að móðir hennar sé að blekkja þá eða ýkja ástand stúlkunnar. Hann hafi fylgst með telpunni í tvö og hálft ár og telji sig þekkja hana og ástand hennar vel.

Hvorki forsvarsmenn Landspítalans né Landlæknisembættisins vilja tjá sig um málið.