Atli Gísla: AGS ræður alltof miklu

Atli Gíslason þingmaður Vinstri grænna segir Alþjóðagjaldeyrissjóðinn ráða allt of miklu um efnahagsmál Íslendinga. Pétur Blöndal þingmaður Sjálfstæðisflokksins segir sjóðinn taka í taumana þegar ríkisstjórn eins og sú sem nú situr sé ráðalaus.

Þingmennirnir Atli Gíslason úr Vinstri grænum og Pétur H. Blöndal þingmaður Sjálfstæðisflokksins voru í Bítinu á Bylgjunni í morgun hjá Heimi Karlssyni og Sólveigu Bergmann. Atli sagði stjórnvöld vera í handjárnum Alþjóðagjaldeyrissjóðsins og landsstjórans Marks Flanagan, sem fer fyrir áætlun sjóðsins á Íslandi.

Atli sagði núverandi stjórn sitja uppi með samning sem Sjálfstæðisflokkurinn hafi beitt sér fyrir við Alþjóðagjaldeyrissjóðinn í nóvember 2008. Pétur sagði Alþjóðagjaldeyrissjóðinn hins vegar ekki blanda sér inn í aðgerðir og lagasetningar stjórnvalda, nema þegar ríkisstjórnir væru úrræðalausar eins og núverandi ríkisstjórn.

„Ég vil fara að skoða hvað hann kostar okkur. Hann á koma hingað til að hjálpa okkur en hann er farinn að skaða," sagði Pétur.

Atli vill endurskoða samstarfið við Alþjóðagjaldeyrissjóðinn. Hann sagði auk þess að það væri óþolandi að sjóðurinn setji það sem skilyrði fyrir aðstoð að Icesave deilan klárist.