Fjöldi fólks á leið austur að Fimmvörðuhálsi

Töluverð umferð hefur verið á Suðurlandsvegi í austurátt í dag og í morgun, samkvæmt upplýsingum frá lögreglunni á Selfossi og lögreglunni á Hvolsvelli. Búist er við því að umferð aukist enn frekar þegar líður á kvöldið.

Lögreglumenn sem Vísir hefur rætt við segja að ferðalangar með vélsleða og fjórhjól í dragi séu sérstaklega áberandi. Þá sagði lögreglumaður á Hvolsvelli að flugvélar væru meira áberandi í loftinu yfir Hvolsvelli en oftast áður. Það er því ljóst að mikill áhugi er fyrir gosinu og víst að margir eiga eftir að nýta sér helgina til þessa að berja dýrðleikann augum.

Lögreglumaður á Hvolsvelli hvetur almenna borgara sem vilja sjá gosið að fara upp í Fljótshlíð. Þaðan sé gott útsýni frá Þórólfsfellinu.