Hangir óviljugur á myndatöflu

Starfsmaður ónefnds stórfyrirtækis í Garðabæ þarf að sætta sig við að hengd sé ljósmynd af honum á upplýsingatöflu í fyrirtækinu. Þetta er niðurstaða Persónuverndar.

Í úrskurði Persónuverndar kemur fram að við ráðningu hafi starfsmaðurinn skilað inn ljósmynd af sjálfum sér til notkunar á innri vef fyrirtækisins, sem ekki er nefnt á nafn hjá Persónuvernd, en er sagt hafa 150 manns í vinnu og vera í framleiðslu. Ljósmyndin af manninum var prentuð út og hengd upp ásamt myndum af öðrum starfsmönnum. Þetta kærði maðurinn sig ekki um og vísaði málinu til Persónuverndar.

Fyrirtækið skýrði málið þannig að ljósmyndirnar ættu að auðvelda samskipti innan fyrirtækisins og lágmarka hættu á mistökum. Persónuvernd segir að slík miðlun á myndum innanhúss sé eðlileg í starfsemi fyrirtækja.

„Ekkert hefur komið fram af hálfu kvartanda sem leiðir líkur að því að sú myndbirting sem hér um ræðir hafi verið til þess fallin að ógna grundvallarréttindum eða frelsi hans,“ segir í úrskurði Persónuverndar þar sem undirstrikað var að myndin af manninum hefði eingöngu verið sýnileg samstarfsfólki hans og ekki öðrum. - gar