Sameining Lýðheilsustofnunar og Landlæknis gæti orðið til bóta

Sameining Lýðheilsustofnunar og Landlæknisembættisins gæti orðið til mikilla hagsbóta og hagræðingar fyrir samfélagið. Þetta segir Geir Gunnlaugsson landlæknir.

Landlæknir segir brýnt að huga einkar vel að velferðarmálum nú þegar kreppir að. Það hafi reynsla annarra þjóða sem gengið hafa í gegnum mikinn samdrátt sýnt. Geir tók við embætti í byrjun þessa árs og segir hann erfitt að koma að störfum á samdráttartímum.

Í lok desember lagði nefnd um breytta skipan stjórnsýslustofnana heilbrigðisráðuneytisins til að landlæknisembættið og Lýðheilsustofnun yrðu sameinuð.

Þá kom einnig fram í áliti nefndarinnar að embætti landlæknis sé ekki nægilega öflug stofnun og hlutverk þess þurfi að skerpa. Þá þurfi að skilgreina sem lykilstofnun, líkt og tíðkast annar staðar á Norðurlöndunum.

Geir tekur heilshugar undir þessi sjónarmið. Hann vonast eftir niðurstöðu um málið innan skamms.