Draga verður úr mæðradauða

Fimmtán hundruð konur deyja dag hvern vegna meðgöngu eða fæðingar, langflestar í Afríku sunnan Sahara. Á kvennaþingi Sameinuðu þjóðanna kom fram rík krafa um að þetta þyrfti að breytast.

Eitt af átta þúsaldarmarkmiðum Sameinuðu þjóðanna snýr að því að draga úr mæðradauða og að því er fram kemur í fréttatilkynningu voru flestir á því að nú þyrfti virkilega að gefa í ef ná ætti settum markmiðum fyrir árið 2015.

„Stemningin hér er mjög mismunandi eftir því hver talar, það er deilt um raunverulegan árangur í málefnum kvenna. Sumir vilja meina að búið sé að ná heil-miklum árangri en aðrir ekki,“ segir Steinunn Gyðu- og Guðjónsdóttir, framkvæmdastýra UNIFEM á Íslandi, sem sat þingið. „Vinnu að friði, öryggi og sjálfbærri þróun í heiminum er stefnt í voða ef ekki er sérstaklega unnið að því að frelsa konur og stúlkur undan misrétti og fátækt,“ sagði Ban Ki-Moon, aðalritari Sameinuðu þjóðanna, á þinginu.

Á þessu ári eru fyrirhugaðar breytingar á skipulagi jafnréttismála innan SÞ.

Nokkrar stofnanir sem nú sinna jafnréttismálum verða sameinaðar til þess að styrkja framvindu og árangur í málaflokknum.

- sbt