Meta hvort útgerðin þoli fyrningu kvóta

Sérfræðingar Háskólans á Akureyri vinna nú að úttekt á skuldastöðu útgerðarfyrirtækja og er ætlað að meta í framhaldinu hvort þau þola fyrningu aflaheimilda. Til grundvallar liggja hagtölur sjávarútvegsins og trúnaðarupplýsingar úr bönkum.

Verkið er unnið fyrir starfshóp sjávarútvegsráðherra um endurskoðun á lögum um fiskveiðistjórnun.

Að sögn Hreiðars Þórs Valtýssonar, forstöðumanns Sjávarútvegsmiðstöðvar skólans, er nú beðið tiltekinna gagna frá Hagstofunni. Þegar þau hafa borist taki tiltölulega lítinn tíma að ljúka verkinu.

Starfshópur ráðherra vinnur á grundvelli stefnuyfirlýsingar ríkisstjórnarinnar en þar er meðal annars kveðið á um að leggja eigi grunn að innköllun og endurráðstöfun aflaheimilda. Hagsmunaaðilar í sjávarútvegi, með Landssamband íslenskra útvegsmanna í fararbroddi, hafa mótmælt þeim áformum harðlega og sagt þau ganga af greininni dauðri.

Guðbjartur Hannesson, formaður starfshópsins, segir ekki standa til að koma fyrirtækjum í vandræði. Ekki eigi að raska fjárhagslegum grunni greinarinnar. „Við höfum alltaf lagt þetta þannig upp að við munum skoða þetta og endurmeta ef hlutirnir ganga ekki upp. Hins vegar held ég því fram að þetta sé hægt en við skulum bíða og sjá hvað kemur út úr þessu.“

Starfshópurinn hefur ýmsa anga fiskveiðistjórnunarinnar til skoðunar.

Framkvæmd leiguviðskipta með kvóta verður skoðuð, sérstakur undirhópur fjallar um eignaréttarákvæði stjórnarskrárinnar og ennfremur er verið að máta hugmyndafræði um nýtingu annarra auðlinda við fiskveiðistjórnunina. Útgangspunktur er þó áframhaldandi aflamarkskerfi, ekki stendur til að meta kosti og galla sóknarkerfis.

bjorn@frettabladid.is