Engar breytingar gerðar á ráðherraliðinu á næstu vikum

Engar breytingar verðar gerðar á ráðherraliði ríkisstjórnarinnar á næstu vikum að sögn Steingríms J. Sigfússonar, fjármálaráðherra. Hann útilokar þó ekki að Ögmundur Jónasson setjist í ráðherrastól síðar á kjörtímabilinu.

Vangaveltur hafa verið uppi um mögulega endurkomu Ögmundar Jónassonar í ráðherrastól en Ögmundur sagði af sér á síðasta ári vegna Icesave málsins.

Steingrímur J. Sigfússon, fjármálaráðherra, segir að engar breytingar verði gerðar á ráðherraliði ríkisstjórnarinnar á næstu vikum.

„Það eru bollaleggingar í fjölmiðlum og algerlega ótímabær umræða enda ekki eitthvað sem menn útkljá í fjölmiðlum. Það ræðum við í okkar hópi. Það liggur fyrir að það verða breytingar á skipan mála innan stjórnarráðsins í áföngum á kjörtímabili. Fyrsta skrefið hefur þegar verið tekið en næstu áfangar hafa ekki verið tímasettir en þeir eru framundan. Málið er í þessum farvegi og það er verið að vinna í því," segir Steingrímur.

Steingrímur útilokar þó ekki endurkomu Ögmundar í ráðherrastól en segir allt tal um að ríkisstjórnin standi veik úr lausu lofti gripið.

„Fjölmiðlar eru margir hverjir komnir langt fram úr sér. Ég held að toppnum hafi verið náð í morgun þegar Ríkisútvarpið fékk einhvern sérfræðing til að ræða möguleikann á utanþingsstjórn. Bíddu nú við, það situr hérna meirihlutastjórn og það er enginn bilbugur á henni. Þannig að menn geta haft gaman af svona sagnfræðilegum vangaveltum um utanþingsstjórnir en það hefur bara verið ein skipuð í sögu lýðveldisins. Það er engin þörf á slíkum bollaleggingum núna enda ekki það sem landið þarf á að halda," segir Steingrímur.