Stjórnarkjör verða marklaus

Vilhjálmur Egilsson, framkvæmdastjóri Samtaka atvinnulífsins, telur að nýsett lagaákvæði um kynjahlutföll í stjórnum hlutafélaga og einkahluta-félaga stríða gegn rétti minnihluta í hlutafélögum. Bent hafi verið á þá annmarka við meðferð Alþingis á frumvarpi um málið en litið hafi verið fram hjá sjónarmiðum samtakanna.

„Við höfum gengið mjög langt í að tryggja rétt minnihluta í hlutafélögum og það er gert með atkvæðagreiðslum," segir Vilhjálmur. „Á sama tíma er ekki hægt að ákveða útkomu úr slíku ferli með tilliti til kynja."

Stjórnarkjör verði því að vissu leyti marklaus því ekki sé víst að niðurstaða úr slíkum atkvæðagreiðslum standist ákvæði nýsettra laga um kynjahlutföll. Óljóst sé hver eigi að bera ábyrgð á að niðurstaða leynilegrar atkvæðagreiðslu samræmist kynjahlutfallalögunum.

Vilhjálmur segir að sama eigi við um hugmyndir um persónukjör til Alþingis. Engin leið sé að tryggja fyrirfram tiltekið kynjahlutfall. „Við viljum að konum fjölgi í stjórnum hlutafélaga. Það þarf hins vegar að gerast með öðrum hætti en lagasetningu og þá helst með því að hvetja til þess og gera um það samkomulag.- bþs