Brekkur og gengi heilla skíðamenn

Hópur níutíu Færeyinga flaug í gær í beinu flugi frá heimalandinu til Akureyrar þar sem dvelja á fram á sunnudag við skíðaiðkun og aðra skemmtan.

Að sögn Guðmundar Karls Jónssonar, forstöðumanns Hlíðarfjalls, valdi fólkið Akureyri að þessu sinni fremur en aðra skíðastaði í Evrópu. Segir hann Færeyinga almennt áhugasama um skíðaíþróttina og stunda hana víða.

Guðmundur segir skíðafólk vilja vera snöggt á staðinn og snöggt í burtu. Akureyri uppfylli það skilyrði þar sem aðeins taki sjö mínútur að ferðast frá flugvelli og í brekkurnar. Sambærilegt ferðalag getur tekið margar klukkustundir víða í álfunni.

Auk þægilegra samgangna njóta erlendir ferðamenn þess nú um stundir að gengi íslensku krónunnar er lágt. Leggst því allt á eitt við að gera Akureyri ákjósanlegan áfangastað erlendra skíðaunnenda.- bþs