Fjárdrátturinn í sendiráðinu í Vín enn til skoðunar

Mál konu sem grunuð er um að hafa dregið sér rúmlega 50 milljónir króna á meðan hún starfaði sem bókari í sendiráði Íslands í Vínarborg er enn til rannsóknar, að sögn Helga Magnúsar Gunnarssonar yfirmanns efnahagsbrotadeildar Ríkislögreglustjóra. Hann segir að rannsóknin hafi gengið afar vel og að á næstunni verði tekin ákvörðun um hvort gefin verði út ákæra.

Málið kom upp í októberbyrjun á síðasta ári. Konunni sem er um þrítugt var vikið frá störfum eftir að hún játaði brot sitt, en þá var hún barnshafandi. Í frétt Stöðvar 2 í október kom fram að konan glímdi við spilafíkn og að svo virtist sem að peningar ráðuneytisins hefðu farið í veðmálsleiki á netinu.