Segja lög tímaskekkju og fagna frumvarpi Álfheiðar

Stjórn Ungra Vinstri grænna fagnar frumvarpi Álfheiðar Ingadóttur, heilbrigðisráðherra, sem miðar að því að fella úr gildi lög frá 1938 sem heimila ófrjósemisaðgerðir á einstaklingum með þroskahömlun eða geðsjúkdóma. Það vekur furðu stjórnar UVG að lögin, sem eru tímaskekkja og brjóta á mannréttindum fólks, séu enn í gildi hér á landi, að fram kemur í ályktun félagsins.

Stjórn Ungra vinstri grænna hvetur þingmenn til þess að samþykkja frumvarpið einróma og fella lögin úr gildi. „Það liggur í augum uppi að lög sem brjóta á mannréttindum þroskahamlaðra einstaklinga og þeim sem glíma við geðsjúkdóma eiga ekki heima í nútíma samfélagi og finnst stjórn UVG löngu tímabært að sýna þessum einstaklingum tilskilda virðingu," segir í ályktuninni.