Reglusamur borgari í fullri vinnu

Maður á fimmtugsaldri sem handtekinn var fyrir að hafa atað málningu á hús Hreiðars Más Sigurðssonar, forstjóra Kaupþings, er í vinnu og ekki þekktur fyrir óreglu. Maðurinn var handtekinn síðastliðið föstudagskvöld og sleppt eftir yfirheyrslur á laugardeginum, en hann er grunaður um að hafa skvett málningu á hús annarra þjóðþekktra auðmanna undanfarna mánuði.

Maðurinn hefur áður komið við sögu lögreglu vegna minniháttar afbrota. Við húsleit heima hjá manninum var lagt hald á tölvu, minniskubba og myndavélar. Lögreglan á höfuðborgarsvæðinu vill engar upplýsingar veita um skýrslutöku yfir manninum og því liggur ekki fyrir hvort hann hafi gengist við brotunum.

Meðal annarra sem hafa orðið fyrir málningarárásum af þessu tagi eru Bjarni Ármannsson, Birna Einarsdóttir, Hannes Smárason, Björgólfur Guðmundsson, Björgólfur Thor Björgólfsson, Steingrímur Wernersson og Lárus Welding.