Skipulögð leit að krabbameini tryggð til næstu ára

Þjónustusamningur milli Krabbameinsfélags Íslands og Sjúkratrygginga Íslands um skipulagða leit að krabbameini í leghálsi og brjóstum kvenna var undirritaður í GÆR í aðalstöðvum Krabbameinsfélagsins í Skógarhlíð. Álfheiður Ingadóttir heilbrigðisráðherra var viðstödd undirritunina og staðfesti samninginn.

Þetta er fimmti samningurinn sem gerður er milli Krabbameinsfélagsins og stjórnvalda um þessa þjónustu en sá fyrsti var gerður 1988, að fram kemur í tilkynningu. Næstu fimm árin verður konum á aldrinum 20 til 69 ára boðið að koma til leitar að krabbameini í leghálsi með tveggja til fjögurra ára millibili eftir viðmiðum samningsins. Fram kemur í tilkynningunni að gert sé ráð fyrir að gerðar verði um 23.500 slíkar skoðanir á ári. Brjóstakrabbameinsleit með myndatöku verður boðin konum á aldrinum 40 til 69 ára á tveggja ára fresti og er áætlaður fjöldi skoðana um 13.500 árlega.

„Samstarfið við Krabbameinsfélagið hefur verið mjög árangursríkt og með þessum samningi er félaginu tryggt fjármagn næstu árin til að sinna krabbameinsleitinni áfram," er haft eftir Álfheiði Ingadóttur, heilbrigðisráðherra, í tilkynningunni. „Ísland er fremst í röð hvað varðar bæði forvarnir og meðhöndlun á krabbameini og viljum við tryggja áframhaldandi góða þjónustu í þeim efnum."

„Tilgangur leitarinnar er að draga úr sjúkdómum af völdum krabbameina í brjóstum og leghálsi og fækka dauðsföllum af þeirra völdum," segir Ragnheiður Haraldsdóttir, nýráðinn forstjóri Krabbameinsfélags Íslands, og bætir við að árangur leitar hafi verið mjög góður á Íslandi undanfarin ár.