Tanorexíufélagið: Brúnkufíkn ótrúlega víðtækt vandamál

„Það hefur orðið algjör sprenging, sennilega um 400 prósent aukning í félagið," segir Ómar Raiss, formaður Tanorexíufélags Íslands, en fjöldi manns hafa sótt í félagasamtökin eftir að fréttastofa Stöðvar 2 greindi frá víðtæku vandmáli brúnkufíkla og hætturnar sem steðja þeim.

„Ég vissi að þetta væri vandamál í samfélaginu en ég vissi ekki hversu stórt það raunverulega er," segir Ómar sem er ánægður með umræðuna sem hefur sprottið upp um málefnið eftir umfjöllun Stöðvar 2 um málið.

Spurður hvert næsta skref sé segir Ómar margt í deiglunni. Meðal annars að halda stuðningsfundi með brúnkufíklum. Ómar bendir á að brúnkufíkn sé dauðans alvara enda geta þeir sem stunda ljósabekkina óhóflega átt hættu á að fá sortuæxli.

Svo vill Ómar ná sérstaklega til grunnskólanema. Það gerir hann með leik á Facebook þar sem fermingabörn geta skráð sig og hlotið vinninga fyrir. Á síðunni eru fermingabörnin hvött til þess að fara ekki í ljós enda er slagorð leiksins: „Ég er svalur ekki steiktur, ég tana ekki !!!"

Til þess að taka þátt í leiknum þá er hægt að fara inn á heimasíðuna hér.

Til þess að fræðast um brúnkufíkn er hægt að nálgast upplýsingar hér.