Sýknudómi yfir blaðamönnum snúið í Hæstarétti

Hæstiréttur Íslands snéri sýknudómi meiðyrðamáls sem Rúnar Þór Róbertsson höfðaði á hendur Erlu Hlynsdóttur, blaðakonu DV og Sigurjóns M. Egilssonar, fyrrverandi ritstjóra sama blaðs.

Fjölmiðlafólkið var sýknað í Héraðsdómi Reykjavíkur í júní á síðasta ári.

Þá sagði meðal annars í niðurstöðu héraðsdóms: „Verður því að telja að hið birta efni hafi á þeim tíma, sem það var birt, átt erindi við almenning og hafi haft fréttagildi. Þó svo fyrirsögn á forsíðu sé færð í stílinn verður að líta til þess, að þar er vitnað í það sem fram kom við yfirheyrslu yfir stefnanda í sakamálinu, þ.e. að hann vildi ekki gefa upp nafn mannsins sem stefnandi var ákærður fyrir að hafa flutt inn fíkniefni fyrir, þar sem hann óttaðist um öryggi sitt og fjölskyldu sinnar."

Fyrir vikið voru þau sýknuð af ásökunum um meiðyrði.

Hæstiréttur er hinsvegar ósammála þessari túlkun og ómerkir orðið „kókaínsmyglarar" sem birtist á forsíðu blaðsins í júlí 2007. Þá var einnig setningin „í þeirri trú að kókaínið væri á sínum stað" einnig ógild.

Í niðurstöðu Hæstaréttar segir að ummælin hefðu falið í sér aðdróttun í garð Rúnar og voru ekki efni til annars en að verða við kröfu hans um ómerkingu þeirra.

Erla og Sigurjón eru dæmd til þess að greiða Rúnari 150 þúsund krónur auk málskostnaðar upp á 250 þúsund krónur.