Svavar segir dóminn áfall fyrir íslenskt samfélag

Dómur Hæstaréttar Íslands þar sem lögbann yfir Ístorrent var staðfest er áfall fyrir frjáls skráarskipti á Íslandi og íslenskt samfélag, segir Svavar Lúthersson, eigandi Istorrent, í tilkynningu sem hann sendi fjölmiðlum.

Hann segir að vegna fjárskorts verði ekki farið lengra með málið. „Þessi dómur skapar slæmt fordæmi af hálfu Hæstaréttar. Nú hefur verið dæmt svo að þeir sem skráðir eru fyrir lénum á Íslandi deila skaðabótaábyrgð með þeim sem reka það," segir Svavar.

Hann segir að á næstu dögum muni hýsingaraðilar þurfa að breyta skráningu léna svo þeir þurfi ekki að deila skaðabótaábyrgð með viðskiptavinum sínum. Venjan hafi verið að hýsingaraðilinn sé skráður fyrir léninu og sé óhætt að áætla að þúsundir léna séu skráð á aðra en þá sem reka vefina sem að bakvið þeim liggja.

„Ég hef tapað málinu en þátttöku minni í frelsisbaráttunni er ekki lokið," segir Svavar.