Bætt aðstaða fyrir börn og ungmenni í austurhluta borgarinnar

Borgarráð samþykkti í dag að gengið verði til samninga um aukin afnot af Egilshöll fyrir íþróttafélög í Grafarvogi sem og aðstöðu fyrir frístundastarf ÍTR í þágu fatlaðra barna og ungmenna. Jafnframt verður gengið til samninga um afnot af svokölluðu Mest-húsi í Norðlingaholti til að koma upp aðstöðu fyrir fimleika, aðrar íþróttir og frístundastarf fyrir börn og unglinga í austurhluta borgarinnar. Þetta kemur fram í tilkynningu frá skrifstofu borgarstjóra.

Þar segir að átak verði gert til að bæta umhverfi Egilshallarinnar, lagfæra lóð og bílastæði. Með Mest-húsinu húsnæðinu verði bætt úr verulegum skorti á aðstöðu fyrir félags- og tómstundastarf fyrir börn og ungmenni í Norðlingaholti.

Hanna Birna Kristjánsdóttir, borgarstjóri, segir í tilkynningunni að íþrótta- og félagsstarf sé mikilvægt fyrir uppbyggingu góðra hverfa í borginni. „Það er fagnaðarefni að tekist hafi að koma til móts við óskir íbúa í þessum barnmörgu hverfum og tryggja nauðsynlega íþrótta- og félagsaðstöðu í austurhluta borgarinnar fyrir þúsundir barna og ungmenna."