Þungar áhyggjur af deilum almennra lækna við Landspítalann

Læknaráð Landspítala lýsir yfir þungum áhyggjum vegna þess ástands sem skapast ef deildar- og aðstoðarlæknar á sjúkrahúsinu mæta ekki til vinnu um næstu mánaðarmót. Tugir lækna gera ráð fyrir að leggja niður störf á morgun ef ekki næst sátt í deilu þeirra við stjórnendur spítalans sem snýst um vinnufyrirkomulag.

Í ályktun frá Læknaráði segir að til að tryggja öryggi sjúklinga og áframhaldandi góða þjónustu beini læknaráð Landspítalans þeim tilmælum til deiluaðila að án tafar verði fundin lausn sem sameinað geti óskir almennra lækna og þarfir Landspítalans.

Læknaráð mælist til þess að fyrirhuguðum breytingum á vaktafyrirkomulagi verði frestað. Þá lýsir Læknaráð sig reiðubúið til að miðla málum í þessari deilu.