Hraunjaðarinn í Hrunagili á sama stað og fyrir helgi

Eyjafjallajökull er farinn að síga á ný og dregið hefur úr gosvirkninni um 20-25 prósent á síðustu tveimur dögum, að sögn Haraldar Sigurðssonar eldfjallafræðings, sem telur að gosið geti þó enn lifað í einhverjar vikur.

Stórfenglegir hraunfossar sjást ýmist falla niður í Hrunagil eða Hvannárgil, til norðurs frá eldstöðinni, en bæði gilin eru á Goðalandi og sameinast Krossáraurum í Þórsmörk. Bæði eru gilin löng og hrikaleg en Haraldur Sigurðsson telur líklegra að hraunrásin nái niður á eyrarnar við Krossá um Hrunagil fremur en Hvannárgil, en hér horfum við einmitt inn að gosstöðinni í dag upp eftir Hvannárgili.

Leið okkar liggur hins vegar inn í Hrunagil til að kanna hversu laangt hraunið er komið á leið sinni niður á sléttlendið. Rjúkandi ár eru skýr merki þess að við séum að verða heitir. Þegar vatnið er snert reynist það brennandi heitt, sennilega 60-70 stiga heitt, þar sem við stöndum um 300 metra frá hraunjaðrinum.

Við fikrum okkur varlega áfram og sjáum reglulega gjósa upp mikla bólstra innar í gilinu en þar er greinilega nýtt hraun að renna ofan á fyrsta hrauninu sem kom þarna niður á fyrstu dögum gossins. Þarna sjáum við svo hrauntunguna og það vekur athygli okkar að hún er á sama stað og síðastliðinn föstudag. Hraunið hefur ekkert fikrað sig nær Þórsmörk yfir helgina.

Þröng hamraþil virðist stífla harunið þarna og það er eins og það komist ekki mikið lengra en þar fyrir innan er það svo að hlaðast upp. Hérna er hraunið búið að renna um það bil tvo og hálfan kílómetra frá gígnum og á enn eftir aðra eins vegalengd niður að Krossá.

Neðar víkkar Hrunagil hins vegar og þar fær hraunið mun meira rými til að breiða úr sér. Okkur virðist því sem hraunrennslið þurfi að verða ansi mikið og langvarandi eigi hraunið að ná alla leið niður í Þórsmörk.