Gylfi bundinn af ákvörðun nefndar um erlenda fjárfestingu

Gylfi Magnússon, efnahags- og viðskiptaráðherra, er samkvæmt lögum um bundinn af ákvörðun nefndar um erlenda fjárfestingu. Meirihluti nefndarinnar féllst í gær á að kanadíska orkufyrirtækið Magma Energy, megi eiga hlut í HS orku. Kanadamennirnir eiga nú þegar ríflega 40% hlut. Í lögum um takmarkanir á erlendri fjárfestingu segir að aðeins Íslendingar og aðilar af EES svæðinu megi eiga í orkufyrirtækjum, en Kanadamennirnir fjárfesta hér í gegnum sænskt félag.

Fram kemur í tilkynningu frá efnahags- og viðskiptaráðuneytinu að Gylfa hafi borist álit nefndarinnar sem komst að þeirri niðurstöðu að fjárfesting Magma gangi ekki gegn ákvæðum laga um fjárfestingu erlendra aðila í atvinnurekstri. Undir þetta álit skrifuðu Unnur G. Kristjánsdóttir formaður, Adolf Berndsen og Sigurður Hannesson. Þau eru fulltrúar Samfylkingar, Sjálfstæðisflokks og Framsóknarflokks í nefndinni.

Silja Bára Ómarsdóttir og Björk Sigurgeirsdóttir, fulltrúar VG og Borgarahreyfingarinnar, skiluðu aftur á móti séráliti. Þær töldu að fjárfesting Magma væri á gráu svæði. Þær lögðu til að skorið yrði úr um lögmæti kaupa Magma með dómi en að öðrum kosti þyrfti að skýra ásetning löggjafans með nýrri löggjöf.