Kom að innbrotsþjófi inni á stofugólfi

Innbrotsþjófar voru á ferð í Garðabæ í nótt. Í Brekkubyggð vaknaði maður upp við það klukkan kortér í fjögur að einhver var að reyna að opna svalahurðina hjá honum.

Þrjóturinn tók á rás þegar hann varð mannsins var og hvarf út í myrkrið. Um tuttugu mínútum síðar kemur íbúi í Bæjargili að óboðnum gesti inni á stofugólfi hjá sér. Sá tók einnig á rás út úr húsinu en lögregla náði í skottið á honum skömmu síðar og gistir hann nú fangageymslur.

Að sögn lögreglu er ekki útilokað að í báðum tilvikum hafi verið um sama mann að ræða.