Einar Karl í iðnaðarráðuneytið tímabundið

Einar Karl Haraldsson hefur tekið við starfi aðstoðarmanns Katrínar Júlíusdóttur iðnaðarráðherra tímabundið. Áður starfaði Einar sem upplýsingafulltrúi forsætisráðuneytisins.

Einar Karl segir í samtali við fréttastofu að Arnar Guðmundsson aðstoðarmaður Katrínar hafi tekið sér launalaust frí í mánuð og fylli hann skarð hans á meðan. Einar mun einnig vinna með samráðshópi ráðuneytanna vegna þeirra erlendu fréttamanna sem von er á hingað til lands í tengslum við þjóðaratkvæðagreiðsluna um næstu helgi.

Aðspurður hvort hann geri ráð fyrir að snúa aftur í forsætisráðuneytið segir hann það verða að koma í ljós. Hann hafi verið ráðinn þangað til hálfs árs og að sá tími sé liðinn.

Hrannar B. Arnarsson aðstoðarmaður Jóhönnu Sigurðardóttur forsætisráðherra segir að á meðan enginn upplýsingafulltrúi sé við ráðuneytið verði fyrirspurnum fjölmiðla vísað á sig.