Rannsóknin verði fyrir opnum tjöldum

Í væntanlegri tillögu um rannsókn á því hvers vegna Ísland var á lista viljugra þjóða, þegar ráðist var inn í Írak 2003, verður kveðið á um að yfirheyrslur fari fram fyrir opnum tjöldum.

Svo segja þingmennirnir Steinunn Valdís Óskarsdóttir og Ögmundur Jónasson, sem eru upphafsmenn tillögunnar.

Steinunn segir að yfirheyrslurnar skuli verða aðgengilegar almenningi en nánari útfærsla, svo sem um hvort yfirheyrslum yrði útvarpað eða sjónvarpað, sé ekki tilbúin.

Ögmundur segir að sér persónulega finnist sjálfsagt að yfirheyrslurnar verði fyrir opnum tjöldum, en svo komi í ljós hvað þinginu finnst um útfærsluna.

Nokkrir þingmenn Framsóknarflokksins munu gerast meðflutningsmenn þingsályktunartillögunnar og flokkurinn leggst því fráleitt gegn henni. Þetta segir varaformaður flokksins, Birkir Jón Jónsson. Spurður um eigin afstöðu segir Birkir að tillögunni hafi ekki verið dreift og hann ákveði sig því ekki að svo stöddu.

„Það er sjálfsagt mál að þessi ákvörðun verði skoðuð á vettvangi þingsins," segir hann.

Spurður hvort málið sé viðkvæmt innan flokksins, í ljósi þess að ákvörðunin var tekin í stjórnartíð Framsóknar, segir Birkir:

„Við Dagný [Jónsdóttir, fyrrum þingmaður Framsóknar] stóðum nú sem forystumenn Sambands ungra framsóknarmanna á mótmælafundum gegn þessari ákvörðun á sínum tíma, þannig að það ekkert leyndarmál hver mín afstaða er."

Þorgerður Katrín Gunnarsdóttir, varaformaður Sjálfstæðisflokksins, segir eðlilegt að fara vel yfir tillöguna þegar hún kemur fram. Hún vill sjá hana áður en hún tekur afstöðu til hennar.

„En á hinn bóginn finnst mér þetta svolítið æpandi að við séum að ræða þessa tillögu á ársafmæli ríkisstjórnarinnar en ekki um skuldavanda heimilanna, hagsmuni atvinnulífsins, vaxtastig, atvinnuleysi og svo framvegis. Mér finnst það nú svolítið íronískt. En ef menn vilja fara þessa leið í forgangsröðun, þá er það skýrt af hálfu ríkisstjórnarflokkanna," segir hún. Þrenar þingkosningar hafi farið fram síðan stríðið hófst, án umræðu um stuðning Íslands.

klemens@frettabladid.is