Ákærendafélag Íslands gerir athugasemd við frétt

Helgi Magnús Gunnarsson, formaður Ákærendafélags Íslands, sem lætur sig varða starfsumhverfi ákærenda, hefur fyrir hönd félagsins gert eftirfarandi athugasemdir við frétt sem birtist á Vísi 3. febrúar síðastliðinn. Athugasemdirnar birtast hér að neðan:

„Í tilefni af frétt á vef Visir.is 3. febrúar sl. sem ber yfirskriftina „Segir saksóknara brjóta lög um meðferð sakamála" vill Ákærendafélag Íslands koma á framfæri eftirfarandi athugasemdum.

Af lestri umræddrar fréttar má draga þá ályktun að ásakanir verjanda sakbornings Vilhjálms H. Vilhjálmssonar um að ákæra í þargreindu máli hafi verið afhent fjölmiðlum fyrir birtingu hennar, séu í garð Kolbrúnar Sævarsdóttur saksóknara sem undirritaði ákæruna f.h. embættis Ríkissaksóknara. Verður ekki séð af lestri fréttarinnar að fyrirsögn hennar um að lögmaðurinn segi saksóknara brjóta lög um meðferð sakamála, séu frá honum komin. Hið rétta er að ákæran í málinu var send Lögreglustjóranum á Suðurnesjum til meðferðar eftir að ríkissaksóknari gaf ákæruna út. Þegar ríkissaksóknari felur lögreglustjórum meðferð mála annast þeir birtingu fyrirkalla og sókn málsins fyrir dómi. Kolbrún Sævarsdóttir hafði því engin frekari afskipti af meðferð málsins eftir að hún gaf út ákæruna, né birtingu ákærunnar. Þetta hlýtur lögmaðurinn að vita.

Varðandi fullyrðingar um að ákærendur málsins hafi afhent ákæruna til fjölmiðla fyrir birtingu var þess ekki getið að fleiri en ákæruvaldið og héraðsdómur sem höfðu ákæruna undir höndum enda voru tveir menn ákærðir í málinu með sömu ákæru."