Tveir fluttir á gjörgæsludeild

Tvö af ungmennunum fimm sem flutt voru á slysadeild eftir alvarlegt umferðaslys á Hafnarfjarðavegi í nótt eru komin á gjörgæsludeild Landspítalans. Þau eru bæði alvarlega slösuð og er öðru þeirra haldið sofandi í öndunarvél. Hin þrjú eru enn á slysadeild en verða að öllum líkindum útskrifuð þaðan í dag, samkvæmt upplýsingum frá vakthafandi lækni á deildinni.

Slysið mun hafa orðið með þeim hætti að bílnum var ekið eftir Hafnarfjarðarvegi til suðurs þegar ökumaður missti stjórn á honum og hann endastakkst á milli akbrautanna og niður á Nýbýlaveginn, þar sem hann hafnaði á hvolfi. Í tilkynningu sem lögreglan sendi frá sér í morgun kemur fram að verið sé að kanna hvort rekja megi orsakir slyssins til ofsaaksturs ökumanns.

Fjölmennt björgunarlið kom fólkinu til aðstoðar og þurfti að beita klippum til að ná því út úr bílflakinu.