Fimm ungmenni slösuðust í bílslysi

Fimm ungmenni slösuðust, þar af tvö alvarlega, á mótum Hafnarfjarðarvegar og Nýbýlavegar í Kópavogi um klukkan eitt í nótt.

Allt fólkið var flutt á slysadeild Landsspítalans og mun að minnsta kosti einn liggja á gjörgæsluldeild. Bílnum var ekið eftir Hafnarfjarðarvegi til suðurs þegar ökumaður missti stjórn á honum og hann endastakkst á milli akbrautanna og niður á Nýbýlaveginn, þar sem hann hafnaði á hvolfi.

Fjölmennt björgunarlið var sent á staðinn og þurfti að beita klippum til að ná fólkinu út úr flakinu. Björgunarstarfið tók á aðra klukkustund og var vegum umhverfis slysstað lokað á meðan.