Litháíska stúlkan ekki einsdæmi

Mál nítján ára litháískrar stúlku virðist vera langt í frá einsdæmi hér á landi.

Fram kemur í dómi héraðsdóms Reykjaness, þar sem fimm menn voru dæmdir í fimm ára fangelsi fyrir mansal, að stúlkan hefur átt ömurlega ævi undanfarin ár, í klóm ofbeldismanna. Hún var seld í vændi í heimalandi sínu, lokið inni og látin leggjast undir menn. Þá var hún „prófuð" af tveimur sakborninganna hér, eftir að hún kom til landsins, og látin veita þeim munnmök. Hún bar að þá hefði hún áttað sig á því að hér yrði hún látin stunda vændi.

Margrét Steinsdóttir, lögfræðingur Alþjóðahúss, telur að fórnarlömb mansals hér á landi geti skipt tugum. Sú sé reynsla hennar eftir fimm ára starf. Engin slík mál hafi áður ratað til dómstóla. Aðstæður kvenna séu mjög mismunandi.

Sigþrúður Guðmundsdóttir, framkvæmdastýra Kvennaathvarfsins telur að fleiri dómar eigi eftir að fylgja í mansalsmálum.