Litlar líkur á þverpólitískri sátt

Sigríður Ingibjörg Ingadóttir, þingmaður Samfylkingarinnar, telur að líkurnar á þverpólitískri samstöðu um Icesave séu ekki miklar. Erfitt verði fyrir stjórnarþingmenn að bera ábyrgð efnahagsmálum þjóðarinnar ef lausn Icesave málsins dregst enn lengur.

„Ég tel því nauðsynlegt að ljúka málinu hratt og örugglega svo hægt sé að snúa sér af krafti að uppbyggingu atvinnulífs í landinu. Hér eru ekki allir sammála og einhverjir telja að Icesave geti beðið mánuðum saman, jafnvel fram á næsta ár. Þeir sem eru á þessari skoðun eru oftast nær einnig andsnúnir samstarfinu við Alþjóðagjaldeyrissjóðinn og Norðurlöndin," segir Sigríður í pistli á heimasíðu Ungra jafnaðarmanna. Þetta hafi verið staðfest í síðustu viku þegar Hreyfingin og Framsóknarflokkurinn lögðu fram tillögu á Alþingi um að hætta samstarfi við AGS og semja nýja efnahagsáætlun á öðrum grundvelli.

Sigríður segir að því miður séu líkurnar á þverpólitískri samstöðu um Icesave eru ekki miklar þó að samráð um meðferð málsins sé áfram mikilvægt. „Það er einnig ljóst að erfitt er fyrir þingmenn ríkisstjórnarflokkanna að bera ábyrgð á efnahagsmálum þjóðarinnar ef lausn Icesave dregst lengi enn. Það þýðir dýpri kreppu, aukið atvinnuleysi og erfiðari ríkisfjármál. Mig fýsir ekki að bera ábyrgð á slíkri þróun."

Þá segir Sigríður að þjóðaratkvæðagreiðslan hafi styrkt samningsstöðu landsins. Þá samningsstöðu ber að nýta hratt og örugglega til að ná nýjum samningum og ljúka málinu.