Flaug til Íslands fyrir Fíusól

„Við erum óskaplega þakklátar Þjóðleikhúsinu fyrir að hafa tekið okkur svona vel. Þetta var alveg frábært,“ segir Þórunn Helga Traustadóttir. Hún fékk að vera viðstödd rennsli á leikritinu Fíasól, sem verður frumsýnt á næstunni, ásamt sjö ára barnabarni sínu Andreu Sólveigu Thierry-Mieg.

Andrea Sólveig býr í Frakklandi og ákvað að nota vetrarleyfið sitt úr skólanum til að fljúga í fyrsta skipti alein til Íslands og sjá sýninguna. Hún er mikill aðdáandi Fíusólar eftir að amma hennar las upp úr samnefndum bókum Kristínar Helgu Gunnarsdóttur fyrir hana í gegnum Skype-samskiptatækið. „Ég passa upp á að rækta sambandið við barnabörnin í útlöndum eins og ég lifandi get. Meðal annars las ég fyrir hana allar bækurnar um hana Fíusól,“ segir Þórunn Helga.

„Við hittumst á Skype-inu þrisvar til fjórum sinnum í viku og ég les fyrir hana kvöldsöguna. Svo kyssumst við góða nótt og hún skríður í bólið sitt,“ útskýrir hún. „Þetta er frábært tæki fyrir okkur sem eigum börn og barnabörn í útlöndum, þetta breytir öllu. Maður getur ræktað, ekki bara tilfinningarnar, heldur einnig tungumálið og allt verður svo miklu einfaldara og betra þegar þetta er til staðar.“

Þórunn segir að Andrea litla sé ennþá í skýjunum eftir að hafa séð sýninguna. „Við áttum alveg dásamlega stund. Þetta var þvílík upplifun fyrir barnið að verða nánast virkur þátttakandi og hoppa í bólinu hennar Fíu og kynnast öllum persónulega. Þetta var alveg stórkostlegt.“ -fb