Ók yfir tvo erlenda ferðamenn í tjaldi

Tveir erlendir ferðamenn voru fluttir með sjúkraflugi til Reykjavíkur eftir að bíll hafði ekið yfir tjald þeirra á Patreksfirði nóttina áður. Mennirnir eru ekki alvarlega slasaðir.

Ökumaður bílsins var færður á lögreglustöðina á Ísafirði. Hann er grunaður um akstur undir áhrifum áfengis og fíkniefna.

Það var klukkan fimm í fyrrinótt sem lögregla var kölluð á tjaldstæðið á Patreksfirði. Þegar lögreglumenn komu á vettvang kom í ljós að bíl hafði verið ekið yfir tjald á svæðinu. Tveir menn voru sofandi í tjaldinu. Reyndist vera um tvo kanadíska, rúmlega tvítuga, ferðamenn að ræða. Hjól bílsins fóru að einhverju leyti yfir þá. Þeir voru slasaðir og jafnframt slegnir eftir atvikið, en gátu þó rætt við lögregluna.

Mennirnir voru fluttir á sjúkrahúsið á Patreksfirði, þar sem þeir voru í rannsakaðir og hlynnt að þeim í gærdag. Hvorki var talið að þeir væru lífshættulega slasaðir né beinbrotnir. Meiðslin voru talin minniháttar miðað við það sem þeir urðu fyrir. Þeir voru hins vegar mjög miður sín eftir þessa ónotalegu upplifun.

Síðdegis í gær voru þeir svo fluttir á bráðamóttöku Landspítalans eins og áður sagði til myndatöku og frekari rannsókna. Þeir voru með áverka á höfði og brjóstkassa eftir að hafa fengið bílinn yfir sig, að sögn Jóns B. G. Jónssonar, læknis á heilbrigðisstofnuninni á Patreksfirði.

Þrennt var í bílnum sem ekið var yfir tjaldið. Það fólk hafði ætlað sér að gista á svæðinu, en atburðarásin varð önnur. Ökumaðurinn, sem er rúmlega tvítugur, var handtekinn og færður á lögreglustöð. Hann var grunaður um ölvun og jafnvel að hafa verið undir áhrifum fíkniefna við aksturinn. Blóðsýni munu leiða það í ljós. Samkvæmt þeim upplýsingum sem Fréttablaðið hefur fengið viðurkenndi hann brot sitt. Auk hans voru vitni færð til yfirheyrslu á lögreglustöð. Þurfti að láta sumt af fólkinu, þar á meðal ökumanninn, sofa úr sér fyrir yfirheyrslurnar í gærdag.

Enginn sérstakur eftirlitsmaður er á tjaldstæðinu á Patreksfirði, samkvæmt upplýsingum sem fengust í áhaldahúsi bæjarins. Hins vegar fara bæjarstarfsmenn þangað reglulega til að þrífa svæðið.

Lögreglan á Ísafirði fer með rannsókn málsins. jss@frettabladid.is