Fimmhundruð hjálpað af Fimmvörðuhálsi

Yfir í fimmhundruð manns var hjálpað niður af Fimmvörðuhálsi í gærkvöldi og í nótt eftir að óveður brast á við gosstöðvarnar. Leiðinni um Mýrdalsjökul frá Sólheimum var lokað þegar veðrið versnaði og var þá ákveðið að nýta vegarslóðann niður Skógaheiði til að koma fólki og jeppum af Fimmvörðuhálsi. Þannig fóru um 140 jeppar þá leið niður.

Einnig var göngufólki komið í björgunarsveitarbíla og einkabíla og var búið að ná öllum niður um þrjúleytið í nótt Skógamegin án teljandi óhappa.

Skoðunarferðir göngufólks Þórsmerkurmegin leiddu til þriggja óhappa í gærkvöldi. Á níunda tímanum var þyrla Landhelgisgæslunnar kölluð út til að flytja mann sem hafði ökklabrotnað í Strákagili.

Um tíuleytið barst önnur hjálparbeiðni, vegna konu sem hafði snúið ökkla á Heiðarhorni. Þriðja beiðnin um sjúkraflug til gosstöðvanna í gærköldi var vegna manns sem hafði snúið ökkla á fæti. Sú beiðni var raunar afturkölluð þar sem önnur þyrla, sem var að flytja ferðamenn, tók að sér það sjúkraflug.