Íslandsbanki afnemur heimildargjald

Íslandsbanki hefur ákveðið að afnema heimildargjald, einnig þekkt sem viðskiptagjald, af yfirdráttarreikningum viðskiptavina sinna. Ákvörðunin tók gildi 21. mars.

Eins og fram kom í Fréttablaðinu 4. mars innheimtu allir stóru bankarnir þrír slíkt gjald, milli þrjú og fimm prósent. Almenna reglan var sú að gjaldið borgaði fólk sem ekki var í sérstakri vildarþjónustu hjá bönkunum og var með yfirdráttarheimildir sem ekki voru nýttar.

Bankarnir hafa sagt gjaldið innheimt í undantekningartilfellum; flestir viðskiptavinir séu í þess háttar viðskiptum, til dæmis náms-, eða gullvild, að þeir greiði það ekki. Gjaldið hafi verið algengara í gamla daga.

Í tilkynningu frá Íslandsbanka segir að það sé liður í endurskoðun gjaldskrár bankans að fella gjaldið niður.

Eftir því sem næst verður komist hefur Landsbankinn það líka á stefnuskránni að afnema heimildargjaldið.

Jóhannes Gunnarsson, formaður Neytendasamtakanna, hefur lýst heimildargjaldi bankanna hér í blaðinu. Hann segir að það sé „út í hött að taka vexti af einhverju sem ekki er notað“.- kóþ