Keyra á Þeistareyki og Búðarháls af stað

Katrín Júlíusdóttir iðnaðarráðherra segir að menn gleymi gjarnan þeim uppbyggingaráformum sem fyrirhuguð eru við Þeistareyki. Þar ætli stjórnvöld sér mikla hluti. Hún segir Icesave hafa verið til trafala þegar kemur að fjármögnun.

„Við erum að vinna mjög markvisst að því að orkan, sem blæs upp á Þeistareykjum, komist í kerfið sem allra, allra fyrst. Menn gleyma því oft þegar þeir eru að leggja mat á það sem leiðir af stóriðjunni og hafa skilið það svæði eftir. Það er alveg ljóst að stjórnvöld leggja mikla áherslu á það svæði. Þar verður mjög stórt orkuöflunar- og atvinnuuppbyggingarsvæði á næstunni.“

Fréttablaðið birti í síðustu viku útreikninga frá hagdeild Alþýðusambands Íslands, þar sem upplýst var að ef töf verður á framkvæmdum við álver í Helguvík og endurnýjun vélabúnaðar í Straumsvík um eitt ár, minnkar landsframleiðsla næstu þriggja ára um 50 milljarða.

Katrín segir að það að hafa ekki gengið frá samningum um Icesave hafi flækst fyrir þegar kemur að fjáröflun. „Icesave-málið hefur verið okkur til trafala, það er ekkert leyndarmál. Ég finn þetta ekki bara í hugsanlegum fjárfestingum í orkugeiranum, en þar hefur það verið sérstaklega slæmt.

Forsvarsmenn orkufyrirtækjanna hafa sagt frá því að erfitt sé um fjármögnun og einn þeirra, forstjóri Landsvirkjunar, hefur sagt að það sé beinlínis út af þessu.“ Katrín segir það því ekki koma á óvart að kostnaður hljótist af því að ganga ekki frá Icesave.

Ráðherra segir margt í gangi hjá stjórnvöldum; reynt sé að semja um Icesave, unnið sé að stóriðjumálum og einnig sé horft til annarra þátta. „Það eru til dæmis að verða til hundruð starfa í sprota- og nýsköpunarsamfélaginu. Við höfum verið að breyta lögum til að örva nýfjárfestingar hjá fyrirtækjum.“

Katrín segir að þótt erfiðara sé um vik með fjármögnun séu ýmis verkefni í gangi. Auk Þeista­reykja nefnir hún Búðarhálsvirkjun, en jarðvegsframkvæmdir fari af stað þar í sumar. Horfa verði til margra þátta.

„Heimurinn er ekki bara svarthvítur, við erum að vinna á mörgum vígstöðvum að því að byggja upp atvinnu og erum líka að reyna að leysa þetta Icesave-mál þannig að fjármögnunarvandinn verði úr sögunni.“

kolbeinn@frettabladid.is