Fimmtán mánaða fangelsi fyrir kynferðisbrot gegn átta ára stúlku

Hæstiréttur dæmdi í dag karlmann í 15 mánaða fangelsi fyrir kynferðisbrot gegn stúlku sem var átta ára gömul þegar brotin voru framin. Honum var gefið að sök að hafa þuklað kynfæri hennar innan og utan klæða og var hann sakfelldur fyrir það. Honum var einnig gefið að sök að hafa sleikt kynfæri stúlkunnar og stungið fingri inn í leggöng hennar en Hæstiréttur sýknaði manninn af þeim ásökunum. Maðurinn játaði fyrri brotin en neitaði hinum seinni staðfastlega.

Að mati dómsins eru brot mannsins mjög alvarleg en honum hafði verið falið að gæta stúlkunnar og leyfði hann henni að gista á heimili sínu þar sem hún bjó við erfiðar heimilisaðstæður. Í stað þess að veita stúlkunni skjól hefði hann hins vegar beitt hana grófu kynferðisofbeldi og brugðist algerlega trausti hennar.

Dómurum þótti því hæfileg refsing í málinu vera 15 mánaða fangelsi auk þess sem maðurinn þarf að greiða telpunni 700 þúsund krónur í miskabætur. Héraðsdómur hafði áður dæmt manninn í 12 mánaða fangelsi og til þess að greiða stúlkunni 600 þúsund í miskabætur. Lögmaður telpunnar fór fram á að miskabæturnar yrðu ein milljón króna og skilaði einn dómari, Ólafur Börkur Þorvaldsson sératkvæði og vildi hann fallast á þá kröfu.