Blés ekki í Vuvuzela-lúðurinn - bryður íbúfen til að slá á sársaukann

„Ég var ekkert að blása í lúðurinn, ég notaði hann til að banka í gólfið til að ná kettinum út svo ég þyrfti ekki að vera á fjórum fótum að ná honum út," segir Andri Snær Njarðarson, íbúi í Fellunum í Reykjavík.

Í frétt á Vísi í gær sagði Andri Snær að hann hefði notað Vuvuzela-lúður til að ná ketti út úr íbúð sinni sem hafði farið þangað í óleyfi. Einhverjir kunnu að hafa misskilið Andra og haldið að hann hafi verið að blása í lúðurinn á köttinn - en svo var ekki.

Andri segir að höndin á sér sé mikið bólgin eftir að kötturinn beit hann. „Fólk heldur að ég sé að gera þetta út af vorkunn, höndin á mér er stökkbólgin þó svo að myndirnar sýna það kannski ekki vel, ég á því miður ekki betri myndavél," segir Andri sem fór þó í vinnuna í dag. „Ég er bara búinn að vera bryðja íbúfen til að slá á mesta sársaukann."

Hann hefur ekki heyrt í eigendum kattarins sem er svartur með rauða ól. „Ég vonast til þess að heyra í þeim ef að þeir frétta af þessu. Ég skora þá á þá að hafa samband. Ég er ekkert reiður út í þá, auðvitað er þetta bara köttur. Þetta er bara leiðinlegt því þetta er ekki fyrsta skiptið sem það er köttur hérna inni, og því miður endaði þessi heimsókn með því að hann beit mig."

Margir hafa haft samband við Andra í dag og sagt honum sambærilegar sögur. „Flestir sem ég hef talað við eru sammála um að það sé kominn tími til að setja einhverjar reglur um þetta, en það eru mismunandi skoðanir um hvað eigi að gera. En það eru allir sammála um að það eigi að gera eitthvað," segir hann.